Starfsemi

Hlutverk GAJU er að breyta matarleifum í verðmætar afurðir, metangas og moltu og draga um leið úr losun gróðurhúsalofttegunda. Frá því að sérsöfnun matarleifa hófst árið 2023 hefur kerfið fest sig í sessi og skilað hreinna og betra hráefni til vinnslu.

Í júní 2025 var tekin í full notkun umbúðaskilja sem gerir okkur kleift að aðskilja umbúðir frá matarleifum og nýta það efni í jarðgerð. Áður var þessi úrgangsstraumur aðeins nýttur til gasgerðar vegna of mikils magns aðskotahluta og efnið því óhæft til jarðgerðar.

Reksturinn hefur verið stöðugur og áfram er stöðugt unnið að því að bæta nýtingu þess hráefnis sem berst til vinnslu í GAJU.

Nú fer stærri hluti efnis í jarðgerð, sem endurspeglar aukna áherslu á fjölbreyttari nýtingu auðlinda innan stöðvarinnar.

Árangursríkt ár hjá Góða hirðinum

Árið 2025 var ár breytinga og framfara hjá Góða hirðinum. Kassinn, viðburða- og fræðslurými félagsins, fékk endurbætur á árinu og hefur tekið á sig flotta mynd.

Efnismiðlunin lokaði útibúum sínum á Breiðhellu og Sævarhöfða, en í kjölfarið var úrvalið á framkvæmdarvörum styrkt í verslun Góða hirðisins á Köllunarklettsvegi 1.

Á árinu hóf Góði hirðirinn formlega sölu á textíl og skilaði góðum árangri. Alls voru 46,2 tonn af textíl seld á árinu 2025. Að auki hlaut Góði hirðirinn viðurkenninguna „Best Goddamn Store" frá Grapevine.

Framundan eru spennandi tímar en árið 2026 mun Góði hirðirinn opna ný útibú á Breiðhellu og á Lambhagavegi, með sérstaka áherslu á framkvæmdarefni.

Endurvinnslustöðvarnar hafa lagt ríka áherslu á þjónustu og fræðslu í daglegum samskiptum við viðskiptavini sína. Endurvinnsluhlutfall á plasti fór vaxandi í kjölfar sérstöfnunar í fjóra flokka. Á endurvinnslustöðvum getur almenningur nálgast ýmsa þjónustu, meðal annars sótt sér brúna poka og körfur fyrir söfnun matarleifa, ókeypis moltu í garðrækt á vorin auk afsetningar flokkaðs úrgangs.

Hjá móttöku og flokkunarstöð millilendir næstum því allur úrgangur sem kemur til SORPU, áður en hann er sendur í réttan farveg. Útflutningur á blönduðum úrgangi til orkuvinnslu hélt áfram með bættum árangri til að koma í veg fyrir urðun. Einnig var málað timbur flutt út til orkuvinnslu. Orkuvinnsla er mun skárri leið til að meðhöndla rusl en að urða það. Með þessu færum við rúmlega 45.000 tonn af úrgangi skör ofar í meðhöndlun, því urðun er það versta sem þú getur gert við rusl og er orkuvinnsla einu skrefi ofar og flokkast sem endurnýting.

Urðunarstaðurinn hætti alfarið að taka við lífrænum og blönduðum úrgangi og urðun hélt áfram að dragast saman. Við það að hætta að urða blandað rusl og lífrænan úrgang í Álfsnesi má gera ráð fyrir að losun gróðurhúsalofttegunda frá urðunarstað SORPU dragist saman um 80% á næstu 10 til 15 árum. Heildarmagn móttekins úrgangs jókst í Álfsnesi milli ára en þar var fyrst og fremst um að ræða jarðefni og timburflís sem var notuð í manargerð til að fegra ásýnd urðunarstaðarins, séð frá Mosfellsbæ.